دکلمه صوتی عاشقی خیال

دکلمه صوتی عاشقی خیال به قلم فرامرز عزیززاده
و با اجرای سحرسهرابی

دردینی چکیرم ، شکلین الیمده ،
گیزلینجه گجه لر داریخاندا من

اؤلچورم گوذاری ، سسسیز ، سایاخسیز ،
اُود توتوب اُودونا ، آلیشاندا من

گدیشیم گؤلدورور هر بیر گوره نی ،
گلیشیم یاندیریر هر بیر باخانی

آدلیملار باشیندا ، آدین دیلیمده ،
شکلینه جان وریب ، دانیشاندا من

سنین له قول بویون ، اُولوب خیال دا ،
اوخورام سودیگیم ، ماهنی نی هر دن

تانریدا طالعین ، یازی پوزوسون ،
گیزلَدیر سوینیر ، چالیشاندا من

هر دونه چیخیرام قارشینا سنین ،
ایتیریب اُوزومی تاپا بیلمیرم

نیلیرم اُوزومی ، اوزگه بیر کسی ،
الله ی تاپمیشام باخیشیندا من

اله بیل یارادان ، باخیر گوزوندن ،
آپاریر هر لحظه منی اُوزومدن

سسلنیر بیر تانیش ، سسلر ایچیمدن ،
دوستوندا من اُوزوم ، تانیشیندا من

اورگیم یوگورور ، عاقلیم بوکولور ،
کونلومده کوکه لیر سوینجین ، عشقین

بو شیرین دویوشی ، گیزلین گوروشی ،
شاعیرلر چوخ ایستیر ، ساواشاندا من

دردینله داغلیام ، سنه باغلیام ،
یازیچی “ساجدم” قارا داغلی یام

واژه لر دوزولور ، نظمه چکیلیر ،
سنیله ساواشیب باریشاندا من

فرامرز عزیززاده #ساجد